ملفات وتحقيقات

قصة من عدن: عتيق و فوزية .. الحب في زمن الكرونا..

الأحد 22 مارس 2020 08:57 مساءً عدن ((عدن الغد)) خاص


 

 

اليوم هو الخميس .. عتيق يدخل البيت وبيده أكياس خضره وفواكه وقرطاس فيبه فُل ومشموم وكادي، ويدور بينه وبين فوزية هذا الحوار..

 

عتيق: فوزية .. فوزية..

 

فوزية: هااا هااا مالك تصيح..

 

عتيق: تعالي شُلي الأكياس من يدي، دوخت من اللفة بالسوق..

 

فوزية: هات هات، الله يحفظك، تعيش وتجيبلنا .. بس أيش فيبه هذا القُرطاس.. ؟

 

عتيق: أيش نسيتي يا حُرمة أنه اليوم خميس..!!

 

فوزية: لا ما نسيت .. داريه أنه اليوم خميس .. بس أيش دخل القرطاس بالخميس..؟

 

عتيق: مالك .. ذه فُل ومشموم وكادي لاوازم الجلسة اليوم .. وقدنا جبت معه قات على كيف كيفك..

 

فوزية: هااا .. قلتلي فُل ومشموم .. بس نقبك طلع على شونه يا مليح..

 

عتيق: ليش .. خير اللهم أجعله خير..!!

 

فوزية: لأنني مش ناوية أخزن اليوم، ولا بجلس معك.. ليش مش داري باللي حاصل بالدنيا.. ؟

 

عتيق: أيش جرى يعني .. إند نحنا عايشين زي الفل والدنيا بخير..

 

فوزية: لا يبان أنت مش عايش بذه العالم .. ماتشوف الأخبار والعصيد اللي حاصل بالعالم بسبب فيروس كرونا والأمراض اللي نازلة ترف علينا..؟!

 

عتيق: أيش فيروسات وأيش من أمراض جني شلك .. هذا حاصل برع مش عندنا يا حرمة، لا تفولي علينا وخلي الخميس يجزع زي الناس..

 

فوزية٪ عتيق .. أهجع و أهدن يا رجال، وخلي يومك يجزع على خير والا شوفني با شل بقشتي وبروح بيت أبي..

 

عتيق: دحين أنتي كلما هدرنا كلمتين قلتي با تبزي بقشتك، مالك صلي على النبي..

 

فوزية: مليه وأنت كمان ما تفهم .. قد العالم كله أتقفل والناس تموت واللي جالسة في بيوتهم وأنت حسك وبالك عند الخميس والفل والمشموم..

 

عتيق: طيب هذا في الخارج، لكن الدنيا عندنا بخير ومافيش حالات يا شيخة..

 

فوزية: وأنت أيش عرفك إنه مافيش عندنا، والا قدك بقدرة قادر رجعت دكتور وعالم بالغيب..

 

عتيق: يا الله خراجك من ذي الحرمة اللي جالسة تفول علينا .. يا شيخة حرام عليك لا تفولي علينا قده الدنيا بخير..

 

فوزية: أني لو بيدي بخلي كل واحد يعيش بغرفة لوحده علشان نأخذ الحيطة والحذر .. ماتشوف الإعلانات والنصائح اللي تقول كل واحد يجلس ببيته وما يخرج علشان محد ينصاب بالعدوى.. ؟

 

عتيق: يا شيخة ربك كبير ولن يصيبنا إلا ما كتب الله لنا قلك كل واحد غرفة من نفسه .. عسى الله كم منه البيت، قده مخزن و داره يجيب الضيق .. جهزي أنتي الغذاء بس وبا نهبله جلسة حناني طناني والمخارج كريم..

 

فوزبة: شوف يا عتيق، إنداني قلك من دحين، لا تقربني ولا أقربك، وكون غسل يداتك واصل وبطل الخرجة حقك كل وقت، خلي نحنا نقر في البيت، لعد تقوم تجيلي مصاب بفيروس من أحد والا من سوق القات اللي لازم يبندونه جعلهم إزالة..

 

عتيق: فال الله ولا فالك يا شيخة، قدك تدوري عذر وتجيبي خبري..

 

فوزية: بطل الكلام الفاضي حقك، الدنيا رجعت تخوف يا عتيق مالك كذه مستهتر بالأمر..!! الناس تموت بالكورجة في كل مكان وعندنا حتى مافيش علاجات، والدولة حتى ما عملت لنا محاجر صحية زي الأوادم..

 

عتيق: لاحول ولا قوة الا بالله، قدك ميتي الناس..؟ أنا الغلطان اللي دلعك، لا بي ولا بالفل والمشموم اللي جبتلك ..

 

فوزية: مو من فل ومشموم يا رجال أهدن .. أقلك فيروسات والناس تموت وأنت حسك تشتي تخمس َكلام فاضي.. أجلس اتشمشمه أنت، أما أني لا أشتي فل ولا كادي .. لعد جعله خميس..

 

عتيق: أصلا أنتي مش حق نعمة..

 

فوزية: أسمع.. شل القرطاس ووديهوا لأمك المسكينة قدك ولا تشلله حاجة، على الأقل بتتجمل معك لما تشوفك داخل عليها بهدية..

 

عتيق: الله يسامحك بس، عكرتي عليا الخميس، أنا بسيبلك البيت وباروح أخزن عند أمي..

 

فوزية: روح يا قلبي، والقلب داعيلك كيه بالله سكهني من الخميس حقك ذه.. بس أسمع من بكرة قر بالبيت ومافيش خرجة لما يقضوا على الفيروس..

 

عتيق: إيييه شكلك تشتي تعمليلي حجر يبان..

 

فوزية: والله علشان مصلحتك أقول ذه الكلام، الله لا قدر يحصلك حاجة وأنت مختلط بالناس والرمامة اللي برع تقول تقندل علينا..

 

عتيق: أسمعي.. أنتي دبور وباتجيبي خبري شكلك، أحسلي أشل نفسي وأخرج من قدامك قبلما بحصلي حاجة.. ممع السلامة.

 

بلال غلام حسين

 

23 مارس 2020م


تعليقات القراء
452431
بلال غلام خوجه... اسم على مسمى... ياشين السرج على البقر | الأستاذ / علي القبرصي
الاثنين 23 مارس 2020
#####################

452431
لاتعليق | ابو محمد
الاثنين 23 مارس 2020
هذا وصفك باهل عدن انهم بس حق خميس وقيتان هم فئه قليله وانت منهم الي تفكرو بهذا الشي والحرمه تخزن للاسف هذه الفئة التي ذكرتها تظهر انها من المتعلمين والمثقفين ويسمون نفوسهم عدانيا ، في عادك نقصت حاجه مهمه الشيشه مذكرتيش ليش ههههه منشور تافهه يامستعدن ..

452431
تهنئية للكاتب | صرخه فارس الصومال لاسعانود الملثم
الاثنين 23 مارس 2020
بسم الله الرحمن الرحيم السلام عليكم ورحمة الله وبركاته اهنئي الكاتب الحباب الاستاذ بلال غلام حسين على اسلوبه الرائع و المسلي والمضحك في نفس الوقت لا يسعني سوى الشكر و التحايا له ، يسعدني ان اقول منذ فترة طويلة لم اضحك و اشكرك على ذلك و السلام على اليمن الحبيب و ان يبعد شعبنا المعاصر الصومال الكبير و اليمن العظيم من البلاء اللهم آمين اخوكم صرخة فارس الصومال الملثم


شاركنا بتعليقك