آراء واتجاهات
الأربعاء 10 أكتوبر 2018 11:58 صباحاً

وربي.. خرماااااااان من قلبي

رمزي محمد حُمادي

خرمااااان مباراة بين فريق التلال والوحدة العدني في ملعب الحبيشي وتلك الجماهير والهتافات والتشجيع والراوحي يغني ويناجم جماهير التلال..

ونخرج بعد انتهاء المباراة ونشرب شاي عدني في مقهى زكو ونتناجم نحن ومشجعين التلال والصياح يصل إلى الركن وندخل سينما الحرية (هريكن) ونتفرج فيلم هندي إلى نصف الليل ولا كأنه صار شيء ونخرج ما نحصلش مواصلات.

ويقع تعبيره وإلا نروح مشي على الرجول من طريق الساحل الى خور مكسر والدنيا اماااااان .. لا مجانين ، ولا نقاط ولا مقاومة ولا ابطال الثورات ولا إرهاب ولا زحمة ولا طفي لصي ولا انفجار هنا او هناك ولا جماعة ابو عنتر و ابو صيّاح..

خرمان أجزع السوق الطويل وشارع الزعفران وامشي بحرية من دون ذاك العك والفوضى والبياعين بالآلاف والزحمة والمداهفة والصياح والسرق والمفرشين اللي بهدلوا بالطريق وتحصل كل واحد مفرش فوق الثاني..

خرمان اطلع ذاك الباص المجري واطبع التذكرة كرسوم باحترام وبأمانة وسط مجتمع حضاري والناس مبتسمين لا يعكر صفوهم لا إنفجار ولا اختطافه ولا فوضى.

خرمااااان تلفزيون عدن قناة واحدى ولا ستلايت ولا ألف قنا وقناة.. فقط تلفزيون عدن وفيها المذيعات أمل بلجون وفوزية باسودان وجميل مهدي وناصر بحاح واغاني الظهيرة حق محمد مرشد ناجي وصباح منصر ومحمد عبده زيدي وبلفقيه ومحمد سعد وفرقة الإنشاد وبعد المغرب تجي لك ديك المسلسلات حق الأطفال وتلاقي الجهال ولا طُري بالشارع.

خرماااان يوم الجمعة يجيبوا قصص عالمية بالتلفزيون الساعة ٩ وتلاقي نحن مقنبرين من الساعة ٨ جنب التلفزيون ولا حركة ولا نخص.

خرمااااان الفاصوليا حق الحاج علي أحمد الله يرحمه اللي مقابل مدرسة العُبيدي في الشيخ عثمان.

وخرمااااااان عصير المانجو بالحليب حق مشرب الشيباني بالشيخ عثمان مع ساندوتشات البيض المفور مع جبن كرافت الأزرق وداخله طماط وبصل وورقة خس.

خرماااان كباب (بالو) في كريتر بشارع الميدان ومطبقية الحاج حسن جداوي المشهورة في مطعم سيف تحت عمارة باجُنيد بكريتر.

مشتاق اروح رحلة للحُسيني ونقطف زيتون وعاط وبيدان ونحنا مروحين ندخل السوق في لحج ونتعشي فاصوليا مع الصليط الحالي وخمير موفى وشاي احمر واهبوووووووووي.

مشتاااااق اروح جولدمور والبريقا بالباص وبدون نقاط وتفتيش ومقاومة ولجان وجماعات ابو زعطان وابو فلتان وأمان ربي محد يقولك فين رايح ولا ايش معك.

مشتاااااق أشوف بلادي نظيفة آمنة، بلا مسلحين ولا بلاطجة ولا محششين ولامحببين واصحاب الشَّم وحبوب الهلوسة ومجانين في كل زغط ولا قات ولا شيشه ولا شمه ولا نت ولا تواصل ولا فيس.. ولا شرعيه ولا انتقالي ولا حزام امني ولا تحالف ولا جوالات ولا وسائل التخريب والدمار الاجتماعي والشعبي ولا يحزنون.

اسألكم.بالله اعيدو لنا ذاك الزمن...


  
جميع الحقوق محفوظة لـ [عدن الغد] ©2018